莫斯科 VS 聖彼得堡 - 4大差異大分析
- Mar 2, 2018
- 3 min read
講起俄羅斯城市，相信大家第一時間都會諗起莫斯科&聖彼德堡。雖然兩個城市分別係"前任" & "現任" 俄國首都，但其實兩個城市之間一直存在著非常大嘅差異。
今次就同大家嚟嗰莫斯科 x 聖彼德堡嘅差異大分析
1. 人
可能大家都有聽過喺日本，東京人同大阪人互相存在住兩套截然不同嘅生活方式，但其實係俄羅斯一樣都會有咁嘅情況出現。
俄羅斯人一向俾人嘅印象都係較負面，例如：不愛笑、神情嚴肅、冷漠等等……。 不過，以上所形容嘅，其實並不是事實嘅全部。
事關係普遍俄羅斯人眼中，以上一眾嘅形容詞佢哋通常只會用於莫斯科人身上，對聖彼德堡人絕對唔啱用！因為俄羅斯人心目中聖彼德堡嘅人通常都係比較斯文有禮、熱心助人等。
咁到底點解會有咁嘅形象呢？
主要係因為由彼德大帝時代開始至到1918年嘅幾百年間，聖彼德堡一直都係俄國首都，亦係俄國對外(歐洲)接收文化及知訊嘅重要窗口，因此大部份知識份子同貴族都搬到聖彼德堡生活，慢慢聖彼德堡嘅居民好自然就同斯文有禮，典雅高貴等形象掛鉤起來。
不過時至今日，仍然有好多遊客去完莫斯科&聖彼德堡都會話覺得聖彼德堡嘅當地人比較有禮貌。
答案其實好簡單
今時今日嘅莫斯科係國際上已經作為一個十分重要嘅國際大都市。好似香港咁，都市人工作壓力大，笑唔出其實都好正常！
相反，係聖彼德堡生活節奏比較慢，加上現行法規禁止在市中心建造高層建築，街上仍保留咗好多舊風格嘅建築，係咁靚嘅環境下生活，人就自然冇咁燥底，臉上容易添加一份笑容啦
2. 城市規劃
莫斯科同聖彼德堡之間除咗生活節奏同環境唔同之外，其實佢地兩個城市規劃完全係南轅北轍。點解咁講？只要大家打開Google Map就自然會一清二楚！
下面分別係莫斯科&聖德堡嘅地圖！
唔知你哋有冇發現呢？ 莫斯科嘅交通係由一個又一個嘅圓形組成，相反係聖彼堡主要係以一橫一直嘅十字路口作為主要城市規劃。
其係咁嘅，因為聖彼德堡市內海拔高度多變，人工運河在市內縱橫交錯，整個城市由42個小島及423座橋樑連接。除此之外，大家不可不知！聖彼德堡市用運河同橋樑連接嘅主要設計係由18世紀設計沿用至今，絕對係一件活生生嘅古董文物。
咁莫斯科又點呢？相對於聖彼德堡，莫斯科位處於內陸地區，地形相對平坦，而且面積亦較大，由於莫斯科作為一個人口超過1000萬人嘅特大型城市，同時亦作為歐亞大陸上重要嘅交通樞紐，所以係城市交通方面就選擇使用環形交通，以疏導龐大的交通量。
3. 天氣
俄羅斯作為全球面積最大嘅國家，國土面積由南到北開始橫跨多個時區，每個城市除咗凍之外，都有自己獨當一面嘅風格！
以早排莫斯科為例，整個十二月加埋竟然只得6分鐘陽光，平均每四日先有一分鐘陽光，加上落大雪，每日嘅生活都可以話係一場生存大挑戰！
雖然係聖彼德堡就冇出現陽光&日照嘅問題，但係聖彼德堡嘅天氣絕對都唔講得笑！ 由於聖彼德堡近海，濕度同海風都比較強，所以好多時甚至比落大雪嘅莫斯科更凍。另外，因為濕度嘅問題聖彼德堡亦不時會出現濃霧，當地市民有時都會覺得相當困擾！但對遊客嚟講，濃霧嘅出現就反而替聖彼德堡增添一份浪漫&神秘感。
4.消費
隨著莫斯科嘅外來人口&經驗貿易持續增長，莫斯科嘅消費漸漸已經超越聖彼德堡，相反聖彼德堡係十幾年嚟仍然維持係大約五百萬居民嘅水平。
咁兩個城市之間消費嘅差距，又到底有幾大呢？
俾少少概念大家
地鐵
聖彼德堡 : 36 盧布
莫斯科 : 50 盧布
酒吧
聖彼德堡 : 140 盧布/ 杯
莫斯科 : 292 盧布/ 杯
餐廳 (基本晚餐 2 人份量)
聖彼德堡 : 1234 盧布
莫斯科 : 1929 盧布
Comments